 Zortzikoetan sentziloa azkarrago dantzatzen da, eta beraz, dantzaera biziagoa du urratsak. Zenbait dantzari zaharri ikusi izan zaien zortzikoko sentziloak Iztuetak deskribatzen duenarekin antz handia du. Gaur egun dantzatzen den sentziloa ren estiloan, hasierako mugimenduak lurra laztanduz egiten dira eta ondoren oin-punta gailur egiten da. Aipagarria da bi aldaerak konparatuz, batean oinak lurretik altxatzen diren mugimenduak, bestean oso lurrean dantzatzen direla, eta alderantziz.
Poliki-poliki deskribatzearren, ezkerreko oinarekin txingo egin eta eskuineko oina hasierako posizioan puntak erakusten zuen norabidean ateratzen da, orkatila eta oin-punta luzatuta dituela. Dantzariaren ardatzetik diagonalerantz atera den oina lurra laztanduz edo lurretik zentimetro bakan batzuetara airean gelditzen da. Hortik atzeranzko bidea egiten du eta lurrean dagoen ezkerrekoaren gainera sartzen da, baina zapaltzen hasi orduko, ezkerreko oina atzerantz abiatzen da eskuinak aurretik zekarren ardatz berean. Atzean ere airean eta luzatuta geratu ondoren, ezkerreko oina eskuina dagoen tokira itzultzen da eta honen azpian sartzen da, eskuineko oina berriz ere aurreranzko diagonalera bultzaraziz. Eskuineko oina hasierako posiziora itzuli, txingo egin eta deskribatutako mugimendua alderantzizko oinekin burutzen da. Sentziloa ren lehen zati hau osatu ondoren, ezkerreko oinarekin txingo egin eta eskuineko hankarekin oin-punta gailur burutzen da, eskuineko hanka goitik jaisten denean ezkerreko oinaren punta zapalduz. Ondoren eskuineko oina albo batean jarri eta ezkerreko oinarekin zapaltzen da berriz ere; ezkerra lurrean jarri eta eskuineko oinaren orpoa ezkerreko oinaren barne-arkuaren txokoan egokitzen da. Modu honetan eskuineko zortzikoko sentziloa osatzen da eta eskuina aurrean dugunez, eskuinarekin txingo egin eta ezkerreko zortzikoko sentziloa egin daiteke. Zortzikoko sentziloa eskuinera zein ezkerrera egiten da, eta biak, bata bestearen ondoren, jaso dira bideoetan.
|
