Txistua eta danbolina dira brokel-dantzari doinua jartzeko erabili izan diren musika-tresnak. Txistua eta danbolina, Europako hainbat eskualdetan jo izan den flauta eta danbor (pipe and tabor) bikotearen euskal aldaera da. XVII-XVIII. mendeetan, besteak beste mugimendu ilustratuaren ondorioz, bilakaera berezia izan du txistuak Euskal Herrian. Musika forma jasoekin homologatzeko ahalegina egin zen, tresnaren tamaina aldatuz garaiko kamerako orkestren eskalara hurbiltzeko.

Erreforma ilustratu horren ondorio da txistuaren familia instrumentala osatzeko emandako urratsa: lau lagunek osatutako txistulari banda. Laukote horretan txistua eta danbolina jotzen dute bi lagunek, silbotea izeneko txistu luzeagoa jotzen du hirugarrenak eta danborra edo atabala laugarrenak. Hala ere, txistua eta danbolinari hedapen handia eman dion formula sinpleak, txistua eta danbolina jotzen dituen musikari bakarrenak, indarrean jarraitzen du. Maiz, atabalari batekin bikotea osatuz aritu izan dira azken mota honetako txistulariak. Aipatutako bi ereduak, txistulariak eta atabalariak osatutako bikotea eta laukoteak osatutako banda, baliagarri dira brokel-dantzari musika jartzeko.

Brokel-dantza sorta osatzen duten dantzetako bakoitzak jatorri eta egokiera desberdina izan dezakeen moduan, horien doinuak ere halakoak dira. Adibidez, jokoen aurretik egin ohi diren zortzikoen aukeraketa danbolinteroaren esku egon zitekeela pentsatzen da, eta beraz, tradizioan hainbat erabiliko ziren. 1924an eta Donostiako txistu eta dantza akademiaren eskaerari erantzunez, Isidro Ansorena txistulariak papereratu zituenek egin dute bide luzeena XX. mendean, baina Jose Inazio Ansorenak txistulari bakoitzak bere gustukoak eta beren teknikari ongien egokitzen direnak aukeratzeko gomendioa ematen du.

Brokel-dantzarako doinu egoki batzuen partiturak eta horien inguruko hausnarketak Txistulari-Dantzariak aldizkari berezian aurki daitezke, Jose Inazio Ansorenak eta Javier Hernandez Arsuagak apailaturik:

"Brokel-dantza en Iztueta", Dantzariak, extraord. -julio 1991 / TXISTULARI - 146, EDB / EHTE., julio 1991, Bilbo, 1991.