Buruzagiak makila berezi bat darabil eskuan brokel-dantza osatzen duten dantza guztietan. Gainontzeko dantzariek tresnak erabiliko dituzte sorta osatzen duten bederatzi dantzetatik seitan. Hain zuzen ere, erabilitako tresnatik hartzen du izena dantza horietako bakoitzak. Bi makila txiki erabiltzen dituztenean, makila txikiena dantzatuko dute; brokel bat eta makila erabiltzen dituztenean, brokel-makilena; makila handiak erabiltzen dira makila handiena dantzatzeko; zintak zintzilik dituen makila handia zinta-dantza egiteko; eta uztai txikiak eta uztai handiak, uztai txikiena eta uztai handiena egiteko.

Buruzagiak eskuan daraman makila berezia buruzagi-makila da.

"Nota. Al dar principio á cada una de estas partes puesto á la cabeza de la comparsa con un bastón semejante al del Tambor mayor bailará 1.º el director de la comparsa D. José Antonio Olano."

Horrela dio 1858an Bilbon eskainitako brokel-dantzarien emanaldirako prestatu zen eskuko programan. Beraz, danborradan danbor nagusiak erabili ohi duen makilaren antzekoa da brokel-dantzako buruzagiak erabiltzen duen buruzagi-makila. Kolore zuriz eta gorriz apaindutako makila da, oinean egurrezko bola bat duena, eta puntan koloretako zintak zintzilikatuta dituena. Gaur egun erabiltzen direnak 45 zm inguru dituzte, baina handiagoak ere erabili izan dira. Beasainen, Loinazeko ezpata-dantzarien buruzagiak antzeko makila erabiltzen du, eta bertan Bolea deitzen diote. Brokel-dantzan gertatu bezala, azken urteotan Beasainen ere buruzagi-makila txikiagoa erabiltzen da.

Aginte-makilaren funtzioa betetzen du buruzagi-makilak. Buruzagia nor den identifikatzeko balio du, eta zenbait unetan dantzarien jarduna zuzentzeko erabiltzen da. Adibidez, buruzagiak bere bakarkako saioa bukatu eta taldearena hasiko dela ohartaraziz, txistulariek deia jotzerakoan buruzagi-makila altxatu egin ohi du.

Makila txikiak 35-50 zm bitarteko luzerako egurrezko makilak izan ohi dira. Proposamen honetarako erabili ditugunak 48 zm dituzte. Dantzariek bina makila erabiliko dituzte, esku bakoitzean bat. Gorputza tente dagoela, ukalondoak gorputzetik zentimetro batzuk aldendu, eta ukalondotik eskumuturrerainoko besaurreak lurrarekin paralelo eta gorputzarekin 90º eginez jarriko ditugu.

Egurrezko makilak metro bat inguru izan ohi dute luzeran eta 3-4 zm diametroan. Garai batean makilak bi koloretan (zuria eta gorria gehienetan) margotuta erabili izan zituzten dantzariek, baina gaur egun margorik gabe erabili ohi dira.

Makila eskuineko aldean hartzen du dantzariak, eskuineko eskuarekin makila azpitik helduta, eta ezkerreko eskuarekin makilaren goiko muturrari helduz.

Brokela ezkutu txiki bat da, dantzariak ezkerreko eskuan daramana. Jose Lorenzo Pujanak txapazko brokelak eta ezpata txikiekin erakutsi ohi zuen dantza hau. Horrelaxe egiten dute gaur egun ere zenbait taldek. Beste zenbait taldetan txapazko brokela, baina egurrezko makila txikia erabili ohi dira. Azkenik, badira dena egurrezkoa, egurrezko brokela eta egurrezko makila txikia, erabiltzen dituztenak ere.

Zumezko uztaiak dira, arinak, erraz erabiltzekoak eta elkarren aurka jota, azkarregi ez apurtzeko bezain gogorrak.

Loreekin edo koloretako apaingarriekin dotoretutako uztaiak dira, eta mutur bakoitzean metro eta erdiko makilekin luzatutakoak. Makilak ere kolore zuri-gorriekin apainduta ageri dira maiz. Makilaren oinetan punta zorrotzeko iltza izan ohi dute uztaiek, akuiluaren modura, uztaiak lurrean indarrez sartu eta tente eusteko modukoak.

Bi metrotik hasi eta lau-bost metro bitarteko luzera izan dezake makilak. Makilaren goiko muturretik koloretako zintak zintzilikatzen dira, dantzari adina zinta. Gipuzkoako zinta-dantzarako 12 zinta erabili ohi dira. Sarritan, zinta makilaren gainean kutxa txiki bat jarri ohi da, barruan uso batzuk dituela. Zinta-dantza bukatzean kutxa ireki eta barruan dauden usoak askatuta hegaz ateratzen dira.