Ezpata-dantzariak lau lerrotan antolatuta daude. Dantzari bakoitzak bere ezpata esku-lekutik hartuko du eskuineko eskuarekin, eta ezpataren punta aurrean duen dantzariari eskainiko dio. Horrela, dantzari bakoitzak ezkerreko eskuarekin atzeko dantzariak eskaintzen dion ezpataren punta hartuko du. Horretarako eskua kanpoaldera irekiko du. Lau lerroen aurrean buruzagia dago, eta honek, lerro bakoitzaren aurrean dauden dantzariek eskainiko dizkioten lau ezpaten puntak hartuko ditu, bi esku bakoitzarekin. Azkendariak, bina ezpata txiki dituztela, taldearen azken lerroan egokituko dira, bakoitza ilara baten atzean.

Taldearen hasierako antolaketa honetatik abiatuta dantzatuko da ezpata-dantza. Ezpata-dantzak bi zati nabarmen ditu: zubiak eta ezpata txikien dantza. Horrez gain, ohorezko zubia egiteko beste mugimendu mota bat egiten da.

Zubiak

Taldekideak, denak batera, musikaren erritmora urratsak emanez joango dira aurreratzen. Buruzagiak erabakitakoan, ezpatak buruz gain altxatuko ditu eta ezpata-dantzari guztiek altxatuko dituzte ezpata luzeak buru gainean. Buruzagiak bira erdi egingo du eta ezpatak eskuz aldatuko ditu. Oinez jarraituko du lau lerroen erditik atzerantz joanez. Lerro bakoitzean lehen postuan dauden dantzariak (1, 2, 3 eta 4 dantzariak) ere biratzen hasiko dira. Ezpatak buru gainean dituztela, 1 eta 4 dantzariak taldearen kanpoko alderantz biratuko dira, eta 2 eta 3 dantzariak, barrurantz. Bigarren lerroan datozen dantzariek gauza bera egingo dute aurreraino iritsitakoan, baina aurreko dantzariaren kontrako norabidean biratuko dira. Hirugarren lerroak lehenaren gauza bera egingo du eta laugarrenak, bigarrenarena. Horrela, talde osoa atzeko aurrera geratu arte.

Azkendariak taldearen aurrealdera iristean bertan geratuko dira. Buruzagiak beste zubi bat egingo du eta taldea berriz ere aurrealdera etorriko da, baina oraingoan azkendariak aurrean izango dituzte zain.

	Ikus Ezpata-dantza bideoa

Ezpata txikien dantza

Azkendariek ezpata txikiekin egiten duten dantzak hiru zati ditu. Lehenengoan txingo luzeko paseoa egingo dute. Bigarrenean zortzikoa dantzatuko dute. Eta hirugarrenean ezpata txikien jokoa egingo dute.

Ikus Ezpata-txikien dantza bideoa

Buruzagiak helduta dituen lau ezpatetatik hiru askatuko ditu, eta eskuineko lerroko ezpata bakarrik helduta duela, korrika hasiko da atabalaren erritmora. Eskuineko lerro osoak jarraituko dio, eta lerroko azken dantzariari bigarren lerroko lehen dantzaria lotuko zaio ezpata ezkerreko eskura luzatuz eta bere lerroa ere korrika jarri araziko du. Hirugarren lerro osoa bigarrenera lotuko da modu berean eta laugarrena, hirugarrenera.

Buruzagiak zirkulu handi bat egingo du korrika eta zubiaren sarrera egin beharreko tokira iristean, bertan geldituko da atzetik datorren dantzariari begira. Ezpata-dantzariak, zubia egin behar den tokira iritsi ahala, ezpatak buruz gain altxatuta dituztela kanpo aldera jiratuko dira berriz ere pareko dantzariaren aurrez-aurre geldituz. Sigi-sagan joan behar dira jartzen dantzariak eta ezpatak goian dituztela osatuko da ohorezko zubia.

Zubia askatzeko, buruzagiak korrika saioa egingo du berriz, eta zubia egiteko prestatu diren orden berean baina kontrako alderantz joango dira biratzen dantzariak eta korrikari ekiten. Hasierako tokira itzultzean, ezpata soka askatu eta lau lerrotan antolatuko da berriz taldea.

	Ikus Ezpata-dantza (Arkuak) bideoa

Urratsak

Ikus Txingo luzeko paseoa	Ikus Zortzikoko sentziloa
Ikus Oin punta gailur	Ikus Belauneko gurpil jirakoa
Ikus Lauarina	Ikus Lasterka jirakoa
Ikus Muriskak	Ikus Azken-azkena