Hainbat urtetan utzita egon ondoren, 1983ko Andre Mari egunean, abuztuaren 15ean, berreskuratu zen Adunako azeri-dantza, baina azken urteotan San Joan jaietan egin izan da. Dantzari kopurua irekia da, eta pertsonaia aipagarria buruzagia da. Buruzagiak muturrean korapiloa duen gerriko batekin joz zigortu ohi ditu oker ari diren dantzariak. Taldea bi lerrotan antolatzen da, buruzagia aurrean dutela eta azeri-dantza osatzen duten dantzak egiten dituzte.