Inauterietako larunbat eta igandean dantzatzen dira; goizean puska biltzea egiten da baserriz-baserri eta eguerdian herriko plazan dantzatzen dira inauteri dantzak. Zortziko taldeetan jarduten dute, baina zortziko bi edo hiru talde prestatzen dituzte. Dantzariekin batera, kapitaina, sarjentua eta puskak jasotzen dituzten bi espentzierok parte hartzen dute inauteri ohitura honetan.

Hamar dantzak osatzen dute zikloa: paseoa, lehenengoa, bigarrena, seigarrena, ostiko-dantza, etxe-dantza, lau ostikoak, azken paseoa, makila-dantza eta pala-dantza. Puska biltzean ari direnean, gehienetan etxe-dantza egin ohi dute.

Irailaren 8an, Amabirjinaren egunean, dantzatu ohi dute soka-dantza Lizartzan. Inauterietako dantzak egin ohi dituen talde berak plazaratzen du soka-dantza. Garai batean inauterietako taldean kapitain eta sarjentu lanak egiten zituztenak izan ohi ziren soka-dantzan aurresku eta atzesku.