Ekainaren 24an, San Joan egunean, gaueko 23.30etan egiten da soka-dantza nagusia Eibarren. Dantzariekin batera, herriko alkateak eta zinegotziek parte hartzen dute eta Untzaga plazan egiten da. Eibarko soka-dantzan Gipuzkoa eta Bizkaiko dantzan egiteko moduak eta urratsak aurki daitezke. 12-16 dantzarik osatzen dute soka.

Eibarko soka-dantza hau beste zenbait auzotan egin ohi da urtean zehar. Azitain auzoan urtarrilean egiten da, San Anton jaietan, eta Santa Gurutzeko ermitan maiatzean, Santa Gurutzeko ospakizunaren ondorengo igandean.

Arrateko amabirjinaren eguna irailaren 8an ospatzen da. Meza nagusian, Arrateko amaren santutegian, ezpata-dantza dantzatzen da eta ondoren prozesioa egiten da. Arrateko egunaren ondoko lehen igandean Arrateko kofradiaren eguna ospatzen da eta egun horretan ere egiten da ezpata-dantza Arrateko elizan.