San Joan egunean dantzatzen dira Tolosan San Joan zortzikoa, bordon-dantza eta aurreskua. 25 dantzarik osatzen dute taldea. Goizean goiz Tolosako kaleak lizarrekin apaintzen dira. Meza nagusiaren ondoren prozesioa eta alardea egiten da, eta tartean bordon-dantzariek San Joan Zortzikoa dantzatzen dute, kanpaiak joka eta eskopeteroak salbak jaurtitzen dituzten aldi berean. Prozesioan San Joan zortzikoa birritan dantzatzen dute esku hutsik aritzen diren bordon-dantzariek.

Arratsaldean egiten da bordon-dantza. Dantzak duen egitura ezpata-dantza batena da, baina ezpatak erabili beharrean, bordoiak erabiltzen dira. 25 dantzarietatik 16 bordoiekin elkar-lotuta daude, ezpata-dantzaren egitura osatuz, lau lerrotan. Aurrean buruzagiak biltzen ditu bordoien lau lerroak. Taldearen atzealdean eta aurrealdean launa dantzari daude, lantza bana dutela eskuan.

16.30etan Plaza Zaharretik Santa Maria plazara joango da taldea. Bordon-dantzariak bezperetako ofiziora sartzen dira elizan. Bordoiak eskuan dituztela, bordon-dantza eginez hartuko dute parte prozesioan. Arrameleko San Joan ermitara iristean, bordon-dantzariek ohorezko zubia egingo dute agintariak pasa daitezen. Ondoren Udaletxe plazaraino itzuliko da prozesioa eta ibilbidean bordon-dantza egingo da zenbait aldiz. Plazan berriz ere ohorezko arkua egin eta agintariak erretiratuko dira.

Zezenketen ondoren, bordon-dantzariak eta agintariak Igarondo-ra joan eta bertan aurreskua edo soka-dantza egiten dute.

Tolosako Bedaio auzoan irailaren 8an, Amabirjinaren egunean, dantzatu ohi da ingurutxoa. Arratsaldeko 19.00etan egin ohi dute eta Amezketako Ugarte auzoko ingurutxoaren oso antzekoa da. Mayordomoek gidatzen dute dantza eta beraien atzetik hamar bikote inguruk jarduten dute.