Gorpuzti egunaren ondoko igandean ospatzen da Oñatin Corpus Christi jaia. XVI. mendean dagoeneko dantzariek Oñatiko Gorpuzti eguneko ospakizunetan parte hartzen zutela erakusten duten agiriak aurkitu dituzte ikertzaileek. Oñatz dantzari taldeko zortzi dantzarik eta buruzagi edo maixuak osatzen dute dantzari taldea. Dantzariek apaingarriak (gona motza, bandak e.a.) gorri kolorekoak erabiltzen dituzte eta buruzagiak, urdin kolorekoak.

Dantzariak ostiralean hasten dira lanean, kalez-kale eta auzoz-auzo herri osoan ibiliko baitira dantzan eta puska biltzean. Igandean, prozesioan dantzan joango dira dantzariak eta arratsaldean, plazan, Korpus dantzen agerraldi nagusia egingo dute. San Sebastianen zortzikoa, banakoa, launakoa, zortzikoa, makil-dantza eta arku-dantza dira egiten dituzten dantzak. Bukatzeko aurreskua edo soka-dantza eskainiko dute.

Oñatin urtean bi aldiz egin ohi da aurreskua edo soka-dantza. Gorpuzti egunaren inguruko jaietan, igande arratsaldean egin ohi den Korpus dantzen emanaldiaren ondoren egiten da. Korpus dantzak eskaini dituzten Oñatz dantza taldeko bederatzi dantzariek osatuko dute soka eta Korpus dantzetan buruzagi lanak egingo dituen dantzaria izango da aurreskularia.

Horrez gain, ekainaren 23an, San Joan bezperan dantzatzen dute Oñatz dantzari taldeko kideek soka-dantza. Gaueko 22.30etan, Olaiturrin, Oñatiko Unibertsitatearen atzealdean, biltzen dira eta sua piztu ondoren, San Joan dantza eta soka-dantza egin ohi dute.