Inauterietako igandean egiten da sorgin-dantza Antzuolan. Zortzi dantzarik osatzen dute taldea, lau gizon eta beste lau emakume arropenkin jantzita. Dantzariekin batera, kapitaina, hartza, domadorea eta tximinoa ibiltzen dira. Herriko kaleetan ibilbidea egiten dute sorgi-dantza hainbat aldiz dantzatuz. Dantza Oriako sorgin-dantzaren oso antzekoa da.

Gipuzkoako brokel-dantzarekin traza handia du Antzuolako trokeo-dantzak, baina baita berezitasunak ere. Uztaileko hirugarren larunbatean, Mairuaren alardearen ondoren dantzatu ohi da trokeo-dantza Antzuolan. Makil txiki dantza, uztai txiki dantza, makil haundi dantza eta zinta-dantzak osatzen dute Antzuolako trokeo-dantza. Hamabi dantzarik eta buruzagi batek osatzen du trokeo-dantzari taldea.

Ekainaren 23an, San Joan bezperan, soka-dantza egiten da Antzuolan. Lehenik eta behin San Joan dantza, eta segidan soka-dantza egin ohi dute Oin-arin dantza taldeko kideek. Horrez gain, uztaileko hirugarren asteburuan ospatzen dira Antzuolako jaiak, eta herriko jaien lehen egunean udal-batzak egin ohi du aurreskua. Oin-arin dantza taldeko kideak lagun hartuta, 20.15etan herriko plazan egin ohi dute dantza.